चाकोरीबद्ध जीवन जगणारा. शाळा, कॉलेज, नोकरी, लग्न….. अस ठरवून दिलेलं आयुष्य, ठरलेल्याच मार्गाने जगणारा…. मी.

एक सीमित, साचेबद्ध आयुष्य एका रेखीव चौकटीत जगताना बाहेरच्या जगाची कसलीही तमा बाळगत नाही. बाहेरच जग देखील मी मला हवं तसं चाकोरीबद्ध केलंय. माझ्या आजूबाजूची माणसं, नातेवाईक आणि जगाबद्दल असलेलं माझं पुस्तकी ज्ञान याच्या जोरावर मी माझ्या गाढव-बढाया मारणार आहे.

मला माहीत असलेल्या प्रत्येक गोष्टींबद्दल मी गाढववाणीने (अधिकारवाणी सारखीच किंवा त्यापेक्षा प्रगल्भ अशी ही वाणी आहे) मी गाढवमते इथे मांडणार आहे. ती माहिती ऐकीव असेल, अपूर्ण असेल तरीही मी गाढववाणीने माझी मते मांडणार.
माझ्या प्रत्येक मताशी मी सहमत असेलच असे नाही, ती गाढव अपेक्षा ठेवू नका.

सध्या लिहिण्यासारखं काही नसल्यामुळे वाचनाच काम करतोय. ब्लॉग लिहिण्यासाठी याचा फार फायदा होतो.

नवीन ब्लॉग लिहिणाऱ्यांना गाढवसल्ला - शक्य ते वाचा त्यामुळे तुम्हाला लिहिताना विचार करण्याची गरज पडत नाही, दोन चार ओळी इकडून - तिकडून आपल्या ब्लॉग मध्ये आपल्या नावाने खपवता येतात. चांगल्या ब्लॉगमधून चांगल्या गोष्टी घेतल्या की उत्कृष्ट ब्लॉग म्हणून तुमचे नाव झाले समजा.